En vésperas do Nadal, a comisión negociadora do convenio colectivo de Centros Especiais de Emprego (CEE) de Galicia reuníase en Santiago de Compostela para comenzar coa negociación do protocolo LGTBI. Este protocolo representa un conxunto de medidas orientadas a garantir a igualdade e combater a discriminación das persoas LGTBI no ámbito laboral. É de obrigado cumprimento para as empresas que contan con máis de 50 persoas traballadoras.
A Asociación de Centros Especiais de Emprego sen Ánimo de Lucro (Cegasal) convértese na primeira patronal galega e tamén a primeira a nivel estatal de CEE en iniciar este proceso.
Conversamos con Ana Traba, representante de Cegasal na comisión, para coñecer máis de preto en que consiste o protocolo, os retos que presenta a súa negociación e o impacto que terá a súa implementación.
- Cegasal é a primeira patronal galega e a primeira de Centros Especiais de Emprego (CEE) a nivel estatal en iniciar a negociación dun protocolo LGTBI. Que significa este fito para a familia dos CEE e a da economía social galega, en xeral?
Este fito coloca a Cegasal como un referente na promoción das políticas inclusivas, representando un avance significativo no compromiso coa igualdade e a inclusión dentro dos Centros Especiais de Emprego. Supón un paso crucial cara a un modelo máis respectuoso coa diversidade e garante espazos laborais seguros e equitativos para todas as persoas traballadoras. Ademais, reforza os valores de diversidade e respecto que son fundamentais no ámbito da economía social galega.
- O protocolo pode servir de exemplo para outras patronais e sectores?
Por suposto. Cegasal está a abrir un camiño que pode converterse nunha referencia para outras empresas na implementación de medidas inclusivas dirixidas ao colectivo LGTBI. Estas accións poderán inspirar a outras patronais a asumir o compromiso de traballar pola igualdade e a inclusión. Ademais, o protocolo podería consolidarse como un modelo a seguir, demostrando como combinar o cumprimento normativo, a sensibilidade social e as boas prácticas empresariais.
- Que tipo de medidas se están a valorar para promover a igualdade e combater a discriminación das persoas LGTBI? Hai algunha que lle preocupe especialmente implantar a Cegasal?
As medidas en consideración inclúen: a formación e sensibilización en diversidade dirixida a todo o persoal, a promoción do uso dunha linguaxe inclusiva, o establecemento de criterios obxectivos para os procesos de contratación e promoción que eviten calquera tipo de discriminación, a incorporación de permisos e beneficios sociais adaptados ás persoas LGTBI, así como a implementación dun protocolo de actuación fronte ao acoso e á violencia contra as persoas LGTBI para lograr contornas laborais diversas, inclusivas e seguras.
Unha preocupación significativa pode ser a aplicación efectiva destas medidas nas pequenas empresas onde os recursos ou o acceso a formacións específicas poden ser máis limitados.
- Deste xeito, as accións formativas ou de sensibilización xogan un papel crucial.
Si, o Real Decreto 1026/2024 establece como obrigatoria a formación en dereitos das persoas LGTBI para todo o cadro de persoal, incluíndo ao persoal de Recursos Humanos e os equipos directivos. Estas formacións son esenciais para fomentar a concienciación, romper prexuízos e garantir a implementación adecuada das medidas planificadas. A sensibilización, ademais, contribúe a crear un clima laboral máis inclusivo e respectuoso.
- Cal cre que é o principal reto ao que se enfrontan para lograr un acordo sobre o protocolo?
Un dos principais retos será alcanzar un consenso entre todas as partes implicadas, especialmente en cuestións nas que poidan xurdir discrepancias sobre a interpretación ou a implementación práctica das medidas. Ademais, será clave garantir que as empresas dispoñan dos recursos necesarios para aplicar estas accións de maneira eficaz, así como adaptar as medidas ás realidades específicas de cada CEE.
- Pode axudar este protocolo a situar aos Centros Especiais de Emprego como referentes de políticas inclusivas na empresa?
Sen dúbida. A adopción deste protocolo reforzará o papel dos Centros Especiais de Emprego como pioneiros en políticas laborais inclusivas. Promover a igualdade e combater a discriminación non só beneficia ás persoas traballadoras, senón que tamén fortalece a imaxe dos CEE como espazos que apostan pola diversidade como un valor esencial. Isto sitúa aos CEE como exemplos a seguir por outras empresas e organizacións, consolidando o seu compromiso coa responsabilidade social e a igualdade.